'Dhoma e veshur me pikturat e tij duket shumë më e madhe, shumë më e lumtur dhe më e bukur ’ Kjo kritikë, nga kandidati për Nobel, Ismail Kadare, përshkruan në mënyrë të përsosur furçën magjike të Rakip Shabanit. Ai lindi në Tepelenë, prandaj, shumica e punëve të tij u frymëzuan nga qyteti i tij i lindjes. Më vonë u zhvendos në qytetin e Vlorës, ku u dashurua me detin. Dashuria për natyrën e bëri atë të përshkojë vendin, duke lëvizur nga jugu në veri, duke bujtur në stanet e çobenjve, majat e maleve dhe duke qëndisur në telajon e tij të gjitha përshtypjet të çdo fshati dhe krahine në vend. Kjo i ka dhënë atij shqisen e hulumtimit jo vetëm për vendet, por edhe për botën e mrekullueshme shpirtërore të njerëzve që ka takuar .. Shabani u diplomua në liceun artistik në 1964 dhe u diplomua në Akademinë e Artit në 1974. Ai u dallua për punimet e tij mbi akuarelin, të cilat e kanë bërë atë të vetmin shqiptar në Enciklopedinë Botërore në këtë teknikë. Ai ka ekspozuar punën e tij në të gjithë botën, duke hapur më shumë se 50 ekspozita në të gjithë globin. Pikturat e Shabanit kanë shëtitur dhe janë të mirëpritur dhe pëlqyer në të gjithë botën si në Angli, Amerikë, Argjentinë, Japoni, Greqi, Gjermani, Rumani, Bullgari, Itali, etj.
Ai fitoi çmimin e tij të parë kombëtar në 1974, me tablonë Nëna Labe, e cila ndodhet edhe në fondin e NAG, sapo përfundoi studimet. Nëna Labe, 1974
Në vitin 1978 vlerësohet me çmim të dytë për punim në peizazh dhe kjo tablo, në vaj, është gjithashtu në NAG. Vlerësime edhe nga presidentët e atëhershëm të Rumanisë dhe Italisë nuk kanë munguar për këtë artist qe lë gjurmë kudo që prek.
Memo Meto, 1978
Ka fituar çmim të dytë per ciklin grafik nga Mesapliku, 1980
Mund të gjeni më shumë 24 nga veprat e tij artistike të ekspozuara në Galerinë Kombëtare të Shqipërisë dhe 21 në Galerinë e Qytetit të Vlorës.
Detajet e furçës së tij flasin aq shumë sa çuditesh me shijen. Jo vetëm një njohës i mirë i artit, por edhe një shikues shumë i përulur gjen në veprat e tij, në çdo kanavacë dhe tablo, njohuri të thella të historisë, etnografisë dhe filozofisë së kombit.
Arti i tij është një përzierje e impresionizmit dhe ekspresionizmit brenda realizmit, që e bën atë edhe një herë unik në stilin e tij.
Në ekspresivitetin e peizazheve në sfondin e kompozimeve mbi Ali Pashë Tepelenën, "Kush solli Doruntinën", "Zanat duke larë", autori jo vetëm ilustron me zgjuarsi fuqinë dhe madhështinë e Ali Pashës, por në pikturat e tjera nuk mungojnë tonet interesante lirike. Duke parë pikturën "Zanat duke u larë", ju mendoni se vetëm gruaja e bukur shqiptare mund të jetë e tillë. Duke shfrytëzuar legjendën "Kush e solli Doruntinën" ku njerëzit ikin, ikin në qiell, marrin jetën e tyre ose vdesin, autori ka ndërtuar me kujdes kompozimin "Konstandini dhe Doruntina". Ai ka një dëshirë të flasë përmes të huajve për bukurinë dhe etnografinë shqiptare, duke filluar që nga Bajroni.
Cikli “Ali Pasha Tepelena” shpreh burrërinë dhe mikpritjen që ai i bën mikut të tij, shqiptarit. Puna e tij është vlerësuar nga shkrimtari i madh shqiptar Ismail Kadare, i cili i ka pëlqyer veprën e tij për frymën popullore të veprës së piktorit.
Studiuesi i artit, Ylli Drishti, e paraqet artistin qysh në vitet e para të krijimtarisë artistike e deri në ditët tona. “Rakip Shabani ka hyrë në lice artistik pa konkurruar. Menjëherë kur e pa mjeshtri Abdurrahim Buza e ftoi në Tiranë. Paradoksi është se ai studioi për skulpturë. Në vitet 1953-63 ka studiuar për skulpturë, por pedagogu i tij, ai që i qëndroi afër ishte sërish mjeshtri Buza”. Drishti tregon më tej se këtij pasioni Shabani nuk iu nda gjithë jetës, në rreth pesëdhjetë vjet krijimtari, që ai me pasion dhe përkushtim ka realizuar peizazhe dhe njëkohësisht edhe portrete, në teknikën e vajit dhe në akuarel. “Ka disa çmime me të cilat është vlerësuar. Në vitin 1974 në ekspozitën kombëtare ku ka marrë pjesë është vlerësuar me çmim të parë për tablonë ‘Nëna labe’, që ndodhet në fondin e NAG-së.
Në v itin 1978 vlerësohet me çmim të dytë për punim në peizazh dhe kjo tablo, në vaj, është në NAG etj. Studiuesi Drishti shprehet më tej se duhet vlerësuar te ky autor impakti me natyrën. “Është piktor i penelit. Ai ruan magjinë dhe freskinë e akuarelit dhe njëkohësisht mund ta vlerësojmë si një artist me këndvështrime kompozicionale të veçanta”.
Rakip Shabani është një vazhdues i mjeshtrave të traditës së akuarelit shqiptar. Sipas Drishtit, duke nisur që nga Gjergj Fishta, Simon Rroka, Fadil Pëllumbi, Sadik Kaceli, Helidon Haliti etj,. punimet e tij sjellin magjinë e peizazhit shqiptar, dashurinë e tij për transparencën dhe ngjyrën që ky peizazh ka. “Do ta vlerësoja dhe për diçka tjetër. Ky piktor është prodhimtar dhe ka një kod të veçantë. Ai peizazhet i bën nga ora pesë e mëngjesit deri në shtatë. Këtë kohë e quan të përshtatshme, sepse transparenca e dritës është më e madhe. Tablotë e tij mund t’i ndajmë dhe me cikle: në atë të baronëve, të portreteve me veshje popullore, të kishave dhe të manastireve shqiptare. Kemi ciklin që i kushtohet Vlorës, bregdetit dhe fshatrave të saj etj. Në vitin 2006 ka qenë prezent në NAG”.
SHKRIM NGA MADRE TERESA GOSPAR, DREJTORESHË E KOHËS E VILLA LUCE, NJEKOHËSISHT ORGANIZATORE E EKSPOZITËS SË PROFESOR SHABANIT NË MILANO
Milano, 15.10.91 I dashur Profesor Rakip SHABANI, Zoti më ka dhuruar mundësinë e takimit me ju gjatë rrugës sime dhe e falenderoj. Për mua ka qënë një eksperiencë shpirtërore shumë e fuqishme, sepse i transmetuat zemrës sime ndjenja të thella të cilat e gjallëruan atë në shprehjen e artit, e cila korrespondon me BUKURINË E ZOTIT.Do t’ju kujtoj gjithmonë si LAJMËTARIN e dashurisë së Zotit dhe do të lutem gjithnjë që ju të vazhdoni të jeni për familjen dhe fëmijët tuaj të shtrenjtë MANIFESTIMI I kësaj Bukurie të Krijuesit në çdo krijim tuajin. Ju falenderoj për këtë BASHKIM SHPIRTËROR kaq të pastër dhe ju përshëndes shumë, shumë! Znj. Teresa Gospar Komuniteti ‘Villa Luce’, Milano
DISA PREJ EKSPOZITAVE
1991 -
Ekspozitë në Milano, organizuar nga Madre Teresa Gospar, drejtoreshë e kohës e Villa Luce.
1992 -
Ekspozitë në Rumani, me përmbajtje të pjesëve më të veçanta nga Shqipëria dhe Rumania, sjellë në akuarel dhe në vaj
Rakip Shabani dhe Presidenti i kohës së Rumanisë
1996 -
Ekspozitë në Greqi, organizuar nga Kryetarja e Bashkisë së Athinës. Ekspozita përmban një varietet veprash, përfshirë punë nga Greqia e lashtë dhe historiku i Shqipërisë.
Rakip Shabani dhe kryetarja e Bashkisë së Athinës dhe ambasadori i kohës Hysen Çabej
1998 -
Ekspozita ‘Pak det në Vlorë’. Peisazhi piktoresk i Vlorës zbukurohet më shumë në penelin akuarelik të prof. Shabanit.
Rakip Shabani dhe Dritëro Agolli
2000 -
Ekspozita në Londër, organizuar nga Veve Center bën bashkë një shumëllojshmëri veprash arti për të kënaqur syrin dhe zgjuar ndjesitë e shijuesve të artit.
2014 -
Ekspozita ‘Pak det në Korçë’ i sjell Korçës një freski bregdeti qëndisur në telajo me kujdes dhe mjeshtëri.
2016 -
Ekspozita ‘Krishtlindjet’, Muzeu Historik Kombëtar. Në këtë ekspozitë piktori sjell objekte kulti, kisha, si në Greqi dhe Shqipëri, duke kompletuar kornizën festive që zhvillohet në Tiranë gjatë festave të fundvitit.
Rakip Shabani dhe ambasadori Rus
2018 -
Ekspozitë vetjake, Galeria Kombëtare e Arteve, 50 punime në akuarel. Punimet përmbajnë kryesisht peisazhe të ndryshme, me bregdetin e Vlorës që zë vendin më të veçantë.
2018 -
Ekspozita ‘Identitet’, Muzeu Historik Kombëtar. 40 vepra në vaj dhe akuarel sjellin në vëmendje etnografinë dhe arkeologjinë shqiptare. Trashëgimia kulturore është e ndërthurur me kostume të zonave të ndryshme.
2019 -
Ekspozita ‘Tirana Urbane Grafike’, Muzeu Historik Kombëtar. Tirana para viteve 40, siç ishte dikur. 33 punime në grafikë që përshkruajnë vendet arkitekturore dhe turistike të Tiranës.
